Kamah hi kawlram ah a thang mi ka rak si. Lai Tlang cu a voi khat hmanh ka rak hmuh bal lo. Mah lio ah cun kan rak har le kan ngeih nak nih a rak phak lo caah tlawn ka duh zongah kan tlawn kho bal tawn lo. Lai Tlang in a ra mi hna nih cun Lai Tlang cu a dawh ngai ngai, cherry par le chawkhlei par a khoi ka kip ah a um mi ram lak ah thingkep par a phun phun zong a rak um tiah an rak ka chimh tawn.
Ka ngakchiat lio ah ka pu nih an mah chan lio ah cun kan Lai Tlang ah sabawi le vom le saram le pangpar dawh dawh le thingthei a phun phun a rak um tawn tiah a rak ka chim bal. A mah zong cu a hlan ah ram a pet tawn i sa zong a tam pi a rak kap bal mi a rak si. Ka pu le an chan lio cu 2nd word war a pit ka te a rak si. Mah lio ah cun kan Lai Tlang hi a rak ra dawh ngai ngai ko lai tiah ka ruah ko. Ka pu nih sa an rak kah nak, ram an pet nak, nga an zuai nak, sa an kah tikah inn kip kha an phawh dan, cunin sabawi an kah tikah sabawi lam he an rak lawmh nak te hoi a rak ka chim tawn ah hin Lai Tlang a si ning ka hoi ruah ah cun a ra nuam tuk ko lai tiah ka ruah. Mah lak cu 1990 hrawng kha a rak si, kamah cu kum 8 hrawng ka rak si lio te kha a si. Ka pu nih Lai Tlang in a rak kan tlawn chel ah sakhi sa le nga a phun phun a rak kan phorh tawn.
Ni le khua cu a kum chim te a thleng leng mang i mi phun le ram zong an thangcho leng mang i a thleng leng mang. Mah cu cu a ho paoh nih hngalh lem cio a si ko. Kei zong cu kum 26 ka si cang i a tu tiang te Lai Tlang cu ka phak rih lo i a hlah nak ram dang tu ah ka phan. Na tein kan Lai Tlang zong a thangcho cang ko ti mi cu ka rak theih pah ve. Mah thancho he cun kan Lai Tlang zong cu hngalh hlan bak ah a thleng cuah mah cang ko. A hlan lio bang a si ti lo ti mi cu a fiang hrim hrim ko i ka ngakchiat lio ka rak hngalh mi ka pu le ka pa le nih an rak chim mi thing le pangpar le saram a phun phun a rak um tawn mi Lai Tlang cu a um ti lo tiah ka ruah ko.
A hlan kan pu le kan pa le chan ah an nun bang in cun kan nun kho ti lai lo ti mi cu a fiang tuk mi a si ko. Kei cu kan sifah le kan cozah a that lo nak in kan thancho nak le kan dai thlan mi nih hin kan Lai Tlang ah a um mi thing le ram a hrawh lem ko tiah ruah ko. Cucaah cun a ho paoh nih kan ruah cio a hau cang ko. A tu chan hi chan chia a si cang, kan thing le kan ram chung um mi thil pakhat kan lak mi kha a fawi tein cham than kho a si ti lo ti mi kha kan ruah a hau cang. Kan sinah um mi thing le ram chungah thil pakhat khat kan lak tikah kan pek than a hau. Kan Lai Tlang hi kan mah kan mi phun dawtnak nak in kan dawt thek a hau cang. Mi phun kan dawtnak nih zei hmanh a kan chuah pi kho lai lo. Kan Lai Tlang zong a hlei in dawh sak thek lai lo.
Ka ruah tawn a chel chel ah, ka tar hnu fa ka ngeih hnu ta hoi ah ka fa le kha Lai Tlang ah a ra dawh mi te zei dah ka hmuh sak hnga hna tiah. Mah tikah cun Lai Tlang zong a um rih te hnga maw tiah ka ruah ve hoi. A hlan ah a um tawn mi sabawi pawl zong duh sah in a thial cang hna. Thingkep par pawl zong a fawi tein hmuh kho si ti hna lo. Far kung pawl zong a hnu ah cun hman tlak a chuak ti hnga maw? Cherry le chawkhlei zong cu par an duh ti hnga maw? Vakok zong Lai Tlang ah um a duh ti hnga maw? Hmai lei kan fa le kan tu le chan ah kan Lai Tlang hi kan pu le kan pa an rak um tawn mi Lai Tlang a si tiah chim awk zong kan ngeih ti hnga lo.
Kan Lai Tlang hi duh sah duh sah in a tlau chin leng mang cang ko. Kan mi le kan nun phung kan dawt kan ti na tein kan thing le kan ram kha tha tein kan zokhenh kho lo. Kan thing le kan ram nih zei tluk dah kan nun phung caah a rak herh i a rak hau ti mi kha kan rak philh sual ko mang tiah ka ruah ko. A tu bang in kan dai thlan rih ko ah cun kan nun phung zong cu duh sah duh sah in a tlau ve te ko lai. Kan Lai Tlang i a rak um tawn mi pangpar dawh dawh an tlau bang kan mi phun le kan nun phung zong duh sah duh sah tein a tlau te ko lai.
